🌺ကုသိုလ်ႏကံႏ တောမ်ႏ အကုသိုလ်ႏကံႏ🌺
~~~~~~~~~~~~~~~~~~
ကုသိုလ်ႏကံႏ🌹
    ကံႏကရိုꩻနဝ်ꩻ ကံႏဟဝ်-ကံႏကုဲင် ၊ ကုသိုလ်ႏကံႏ-အကုသိုလ်ႏကံႏ အဝ်ႏနီမျိုꩻသွူ။ ကုသိုလ်ႏကံႏကရိုꩻနဝ်ꩻ ကာမာဝစရကုသိုလ်ႏကံႏ ၊ ရူပါဝစရကုသိုလ်ႏကံႏ ၊ အရူပါဝစရကုသိုလ်ႏကံႏ ၊ လောကုတ္တရာꩻကုသိုလ်ႏကံႏ အဝ်ႏလစ်ꩻမျိုꩻသွူ။

🌻ကာမာဝစရကုသိုလ်ႏကံႏနဝ်ꩻ အကျိုꩻဖေႏ ကာမဘွုံႏနဝ်ꩻသွူ။

🌻ရူပါဝစရကုသိုလ်ႏကံႏနဝ်ꩻ အကျိုꩻဖေႏ ရူပဗျဟ္မာႏဘွုံႏနဝ်ꩻသွူ။

🌻အရူပါဝစရကရိုꩻနဝ်ꩻ အကျိုꩻဖေႏ အရူပဗြဟ္မာႏ ဘွုံႏနဝ်ꩻသွူ

🌻လောကုတ္တရာꩻကုသိုလ်ႏကံႏနဝ်ꩻ အကျိုꩻဖေႏ လောကုတ္တရာꩻဖိုလ်ႏသွူ။ ဉာဏ်ႏသုမ်ꩻအလꩻ အကျိုꩻတရာꩻယိုခံႏစာꩻဗာႏနဝ်ꩻသွူ။

☀️ ကာမာဝစရကုသိုလ်ႏကံႏကရိုꩻနဝ်ꩻ ကာယကံႏ သွံပါꩻ ၊ ဝစိကံႏလစ်ꩻပါꩻ ၊ မနောကံႏ သွံပါꩻ လို့လို့အဝ်ႏ အပါꩻ (၁၀)နဝ်ꩻသွူ။ ကာယကံႏ ၊ ဝစိကံႏ ၊ မနောကံႏ (၁၀)နဝ်ꩻဝင်ꩻဟဲ့ “သုစရဲက်” အကျင်ꩻစာရိတ္တဟဝ်နဝ်ꩻသွူ။ ကုသိုလ်ႏယိုနဝ်ꩻ အပဲစ်ကင် ၊ ဖေႏဒျာႏထာꩻဟဝ်ကျိုꩻတရာꩻ သဖော်ꩻနေးနဝ်ꩻသွူ။ နမ်းခန္ဓာႏ ၊ ဖြောင်း ၊ သꩻ ၊ ကထွာဒျာႏ “သုစရဲက်” (၁၀)ပါꩻနဝ်ꩻ လိုꩻခမ်း ၊ လူꩻခမ်း တွိုႏအီဒျာႏ “သုဂတိ” ဖဝဟဝ် ၊ တဖူꩻဟဝ် နဝ်ꩻသွူ။ နဝ်ꩻမꩻ ဝင်ꩻဟဲ့ “ကုသလကမ္မပထ” တရာꩻ(၁၀)ပါꩻနဝ်ꩻသွူ။
ကုသိုလ်ႏကံႏအကိုကရိုꩻဒါႏ “သမ္မာဒိဋ္ဌိ” နဝ်ꩻ ထာꩻယူႏမဲဥ်ႏ ၊ ကံႏ ကံႏအကျိုꩻယိုယွုမ်းအံႏ ၊ မနောကံႏနဝ်ꩻ အခေႏခံႏကံႏအကို အရေꩻတန်ꩻသွတ်ꩻသွူ။

အကုသိုလ်ႏကံႏ🌷
        အကုသိုလ်ႏကံႏကရိုꩻနဝ်ꩻ ကာယကံႏ သွံပါꩻ ၊ ဝစိကံႏ လစ်ꩻပါꩻ ၊ မနောကံႏ သွံပါꩻ ၊ လို့လို့အဝ်ႏ(၁၀)ပါꩻသွူ။ အကုသိုလ်ႏနဝ်ꩻ အပဲစ်အဝ်ႏ ဖေႏဒျာႏထာꩻတဟဝ်တဝ်း အကျိုꩻတရာꩻသဖော်ꩻအဝ်ႏနေးနဝ်ꩻသွူ။ နမ်းခန္ဓာႏ ၊ ဖြောင်း ၊ သꩻ ကထွာဒျာႏ “ဒုစရဲက်” (၁၀)ပါꩻနဝ်ꩻသွူ။ “ဒုစရဲက်” (၁၀)ပါꩻနဝ်ꩻ ငရုဲင်ꩻ ၊ တိရစ္ဆာန်ႏ ၊ ပြိတ္တာႏ ၊ အသူႏရကယ်ႏ ၊ တွိုႏအီဒျာႏအပါယ်ႏ လစ်ပါꩻ တဖူꩻတဟဝ်တဝ်းနဝ်ꩻသွူ။ နဝ်ꩻမꩻ ဝင်ꩻဟဲ့ “အကုသလကမ္မပထ”တရာꩻ
(၁၀)ပါꩻနဝ်ꩻသွူ။ အကုသိုလ်ႏတရာꩻနဝ်ꩻ အထဲ့ꩻဒါႏ အပါယ်ႏလစ်ဘွုံႏအကို ခံႏစာꩻဗာႏ ဒျာႏအကျိုꩻတရာꩻဟဝ်တဝ်းနဝ်ꩻသွူ။

ခွန်ခမ်းခွꩻ(ဒုံကောင်ထို)
၄-၉-၂၀၁၉