“အရွယ်ႏသွံပါꩻတရွေꩻတဝ်း”

- ဒေါ့ꩻခန်းဥပမာႏတဗာႏ အဝ်ႏရန်ႏကွုန်ႏလွေꩻခန်း မန္တလေꩻမွိုင်..လွေꩻသွူရထာꩻဘူတာတွော့ꩻ ဖြေꩻခန်း လက်မတ်.... လက်မတ်အလောင်းဝင်ꩻတဲမ်းဖေႏခန်း ခုံႏနံပါတ်တွမ်ႏမဥ်ꩻ...အီသွူလက်မတ်တွော့ꩻ ယိုနဝ်ꩻ ခွေခုံႏရိုꩻသွူနေးနဝ်ꩻတွော့ꩻအုံလင်ꩻခန်းဒျာႏဝင်ꩻဖုံႏ ...ရထာꩻအဝ်ႏရန်ႏကွုန်ႏထန်ႏတွိုႏခန်းပဲခူး..ရန်ႏကွုန်ႏ-မန္တလေꩻ မုဲင်ႏပေါင်ꩻအဝ်ႏခန်း (၄၅၀) မွိုင်...

တွိုႏပဲခူးတွော့ꩻ မုဲင်ႏလို့ထိုꩻလဲဥ်း (၅၀)...နီပဲင်ႏဆဲင်ႏ ခွင်ꩻနဝ်ꩻ အဝ်ႏကုဲင် (၄၀၀)လွုမ်ꩻရထာꩻတဲ့
အဝ်ႏအလွေꩻ ငါလွဥ်းလွဥ်း လွေꩻချာနဝ်ꩻ
အဲဥ်ထဝ်းသွူ....

- စွုမ်ႏတွိုႏပျဥ်းမနားတွော့ꩻ မုဲင်ႏ(၂၀၀) လို့ထိုꩻလဲဥ်း နီကပဲင်ႏဆဲင်ႏခွင်ꩻနဝ်ꩻကွဲးယွမ်ယွမ်လွဥ်လဲဥ်း...ကွဲးလွေꩻလွေꩻတဲ့ခွေကပဲင်ႏဒျာႏဥစ္စာႏဖုံႏယို
ကွဲးယွမ်ယွမ်သဲင်ꩻနဝ်ꩻတသေယူႏတဝ်းဝင်ꩻဖုံႏ..
တွိုႏခန်းမန္တလေꩻ–ရထာꩻစွုမ်ႏအုံဘူတာတွော့ꩻ နီကဖြေꩻသေခါꩻလက်မတ်နဝ်ꩻသွုံꩻစောင်းလꩻဒွုမ်နယ်  ယိုနဝ်ꩻခွေခုံႏရိုꩻသွူနေးနဝ်ꩻတွော့ꩻထူႏလွေꩻလဲ့မလꩻ

“ထူႏလွေꩻလꩻနဝ်ꩻအဝ်ႏတမုဲင်ꩻ..”
ထူႏလွေꩻလꩻနဝ်ꩻအဝ်ႏနီဆဲင်ꩻထုံꩻကိုကပါလွဥ်ဒျာႏရွဥ်ယိုနီလွေꩻမုဲင်ꩻလွေꩻထွာဒျာႏနီ “ရိက္ခာႏ”သွူ..
“ ရိက္ခာႏ” ကရိုꩻနဝ်ꩻနီကမာꩻခါꩻဒါႏကုသိုလ်ႏ ၊ အကုသိုလ်ႏဖုံႏနဝ်ꩻသွူ။

လိုꩻဖုံႏယိုနဝ်ꩻ နီတစိုးသက်နီကပဲင်ႏဆဲင်ႏဒျာႏ စီꩻပွာꩻ၊ ဥစ္စာႏ ၊ ပညာႏ ၊ အာႏဏာႏ ၊ကားကအဝ်ႏယိုနီတတွိုႏ တဝ်းဒွိုန်းဘူတာတွော့ꩻနီပဲင်ႏဒျာႏ... ပေါတွိုႏသွူ ဘူတာတဲ့ကားကအဝ်ႏယိုအွဥ်ႏကုဲင်ဗာႏလွဥ်းလွဥ်းသွူ “ပုည” ကရိုꩻဒါႏထာꩻဟဝ်ကုသိုလ်ႏယို နီကမာꩻခါꩻ ဒျာႏ ဒါန ၊ သီလ ၊ သမထ ၊ ဝိပဿနာႏ ဖုံႏနဝ်ꩻသွူ။
ထာꩻဟဝ်အမျိုꩻဖုံႏယိုနဝ်ꩻ ရန်ႏသူႏ ငတ်ပါꩻ တခွန်ꩻထိုꩻ၊ ယားထိုꩻ လꩻတဝ်းသွူ။ ဗꩻနီနမ်းကဖြား ၊ နီနမ်းကဆာ ၊ နီနမ်းကသီ ထာꩻဟဝ်နဝ်ꩻအဝ်ႏသီလ ၊ သဒ္ဒါ ၊ ပညာႏ ၊ တွမ်ႏ ကုသိုလ်ႏလွုမ်ꩻသွူ။

-ယိုလစ်မျိုꩻနဝ်ꩻ ထွာဒျာႏနီဖဝခြွိုင်းခြိုꩻသွူ နီနမ်းခန္ဓာႏယိုတနီꩻတစိꩻစိꩻ ကွဲးတန်တန်လွဥ် သက် (၅၀)လွိုသွူနဝ်ꩻ နီနမ်းခန္ဓာႏယိုတစွိုးတဝ်းတစွိုး တမျိုꩻတဝ်းတမျိုꩻ ကုဲင်လွဥ်သွူတနီꩻတစိꩻစိꩻနဝ်ꩻ အဝ်ႏထီႏဖိုဒျာႏမွေးတဝ်းနယ်...

နဝ်ꩻမꩻအခိန်ႏအဝ်ႏတွင်ꩻနဝ်ꩻမာꩻသွော့ဝင်ꩻထာꩻဟဝ်ကုသိုလ်ႏ..

ပထမအရွယ်ႏနဝ်ꩻထုမ်ႏပညာႏ
ဒုတိယအရွယ်ႏနဝ်ꩻထုမ်ႏစီꩻပွာꩻ
တတိယအရွယ်ႏနဝ်ꩻထုမ်ႏတရာꩻ
ငဝ်းအဝ်ႏနေးနဝ်ꩻရိုꩻကီလဲ့ နုဲင်းခွေသွဥ်းအနေႏ တရာꩻယို နီအရွယ်ႏသွံပါ ထုမ်းနဝ်ꩻအဟဝ်သွတ်ꩻသွူ။

ထွာတမုဲင်ꩻနဲးတဲင် ပထမအရွယ်ႏသွဥ်ထူႏပညာႏ တွင်ꩻသီထိုꩻခန်းမွိုင်နဝ်ꩻ တရာꩻယိုဝွေꩻလွေꩻထုမ်ႏခိန်ႏ မုဲင်ꩻ ၊ ဒုတိယအရွယ်ႏတဲ့နေးနဝ်ꩻနေနေ အဝ်ႏထုမ်ႏစီꩻပွာꩻတွင်ꩻသီထိုꩻခန်းမွိုင်နဝ်ꩻတရာꩻယို ဝွေꩻအီႏမော့ꩻမုဲင်ꩻကို....

-လိုꩻယဟန်ႏနဝ်ꩻအဝ်ႏကရိုး ခွေယိုအဝ်ႏပေႏအဝ်ႏ ဆားက တရာꩻယိုခွေမိဥ်ႏဖြားမꩻမာꩻ၊ခွေမိဥ်ꩻဖြားမꩻထုမ်ႏ ရိုꩻလိုꩻနဝ်ꩻစားတဲ့အဝ်ႏထီႏဖိုအာတန်သွူ...ထာꩻသီတရာꩻယိုနီတထီႏရီးတဝ်း...

လိုꩻပေႏယဟန်ႏနဝ်ꩻသက်လꩻနီနေင်ႏသွံနေင်ႏလစ်
နေင်ႏငတ်ꩻနေင်ႏဖုံႏ သီထိုꩻလဲဥ်း ၊ စꩻလွူးဖွာလွုမ်တဲ့သီထိုꩻတဲ့အဝ်ႏ... ယဟန်ႏနဝ်ꩻသက်လꩻနီဆီ၊သွံဆီ သီထိုꩻတဲ့အဝ်ႏထီႏ ဖိုအာတန်မွေးတဝ်းနဲ့...နဝ်ꩻမꩻထာꩻသီတရာꩻယို
အရွယ်ႏသွံပါꩻတရွေꩻတဝ်းအကျောင်ꩻ.....

အမာႏမိဥ်ႏပါတဲ့ခွင်ꩻလွစ်သွော့
ကေꩻဇူꩻတင်ႏငါႏသွူဩ

ခွန်ခမ်းခွꩻ(ဒုံကောင်ထို)
29-7-2019