သဲင်ꩻလိုꩻမနုဿယို ကောပ်စွဉ်ႏ စိုးကရီး၊ ပန်ကရီး ကုသိုလ်ႏကံႏဟောဝ်ငါႏမꩻ နီသဲင်ꩻထွာဗာႏလိုꩻသွူ သဲင်ꩻထွာသွူလိုꩻတကာႏတောဝ်း သမ်းသဲင်ꩻကျုံႏခွဲပါယင်း မွိုးဖါနီပါꩻ သမ်းထွာဒျာႏ ဗုဒ္ဓဘာႏသာႏလိုꩻမျိုꩻနောဝ်ꩻ ကံႏယိန်းဟောဝ်ဟောဝ်သွူ...
၁။ ပထမအရွယ်ႏ ထုမ်ႏပညာႏ
၂။ ဒုတိယအရွယ်ႏ ထုမ်ႏဥစ္စာႏ
၃။ တတိယအရွယ်ႏ ထုမ်ႏတရာꩻ
ငေါဝ်းဖုံႏနောဝ်ꩻ အောဝ်ႏမွေးဒျာႏ ကွဲတွော့အောဝ်ႏထုမ်ႏပညာႏတွင်ꩻတရိုꩻတောဝ်း၊ အောဝ်ႏထုမ်ႏစီꩻပွါꩻဉစ္စာႏတွင်ꩻတရိုꩻတောဝ်း၊ မာရဏမင်ꩻယို မိဉ်ႏလွဉ်ဟဲ့ꩻစွော့ခန်းမွိုင်နီနောဝ်ꩻ ထာꩻဟောဝ်ကုသိုလ်ႏ တရာꩻဖုံႏယို နီအီႏထုမ်ႏအခိန်ႏမုဲင်ꩻ၊ နီအီႏအာႏထွုတ်အခိန်ႏမုဲင်ꩻ....
ထာꩻသီတရာꩻယို နီနာꩻတထီႏရီးတောဝ်း၊ နီနာꩻတသေရီးတောဝ်း၊ နောဝ်ꩻမꩻ ပထမအရွယ်ႏတရိုꩻတောဝ်း၊ ဒုတိယအရွယ်ႏတရိုꩻတောဝ်း အောဝ်ႏလိုႏမာꩻငါႏဝါင်ꩻ ကုသိုလ်ႏ၊ အောဝ်ႏလိုႏအာႏထွုတ်ငါႏဝါင်ꩻတရာꩻဖုံႏသွူ...
(၁) ပထမအရှယျန ထုမျနပညာန
နီအရွယ်ႏအောဝ်ႏဆားဒွိုန်းက နီအောဝ်ႏလိုႏထုမ်ႏပညာႏ ထာꩻဟောဝ်ကုသိုလ်ႏ၊ တရာꩻဖုံႏယို ဖေႏနေးနီကလꩻနောဝ်ꩻ နီအီႏထုမ်ႏဗာႏ အနယ်ꩻနုဲင်းမုဲင်ꩻ?
- ကေားကထွာဒါႏ အမွိုးအဖါဖုံႏယို နီပိုခို၊ နီပိုမူႏယို သွဉ်ဖေႏသွော့ ငေါဝ်းဝုဲင်ႏဖရာꩻ
- မွူးဟာတလဲင်ႏ မွူးရေဝ်ꩻတလဲင်ႏ အွဉ်ဝုဲင်ႏသွော့ဖရာꩻ
- အွဉ်အုံသွော့တရာꩻ (အုံညညတဒါႏတောဝ်း ရိုꩻကီလဲ့ အဆေ့ꩻသွတ်ꩻ ငတ်မိနစ်နောဝ်ꩻ အုံသွော့)
- လာဗွေနီꩻတရိုꩻတောဝ်း၊ လာမားနီꩻတရိုꩻတောဝ်း အွဉ်ထင်ႏကုဲင်းကုဲင်း ဗွေႏဗွန်ကျောင်ꩻ
- နီပိုခို၊ နီပိုမူႏ ဖေႏနေးကလိန်ႏမာႏ၊ ဖေႏနေးကယေန်ႏကေႏနောဝ်ꩻ ခမ်းသဲင်ꩻလာ ကျောင်ꩻပေ့ꩻခိန်ႏ ဗွေသင်္ဃာႏသီး ကဗွောင်ꩻဖေႏဒျာႏ ဓမ္မစက္ကူး ယေန်ႏကေႏမုသွဉ်တန်ꩻ ဖုံႏယို ပသာသွော့ဝါင်ꩻ
နီမိဉ်ႏမာꩻဖေႏ အချက်နုဲင်းဆꩻကီယိုဖုံႏနောဝ်ꩻ နီနမ်းတာႏလဲ့ လꩻကုသိုလ်ႏ၊ နီပိုခို၊ နီပိုမူႏ သီႏလဲ့ လꩻကုသိုလ်ႏ၊ ယေန်ႏကေႏလွဉ်နောဝ်ꩻ အမန်ႏသွူ...
(၂) ဒုတိယအရှယျန ထုမျနဉစ်စာန
နီအရွယ်ႏယိုနောဝ်ꩻ နီပိုတာႏ၊ နီမာတာႏ၊ နီအံႏအွꩻတာႏ၊ နီစီꩻပွါꩻရေꩻ အတာႏ နီအောဝ်ႏလိုႏထုမ်ႏဒျာႏနောဝ်ꩻ ကုသိုလ်ႏယို နီအီႏမာꩻဗာႏအခိန်ႏမုဲင်ꩻ၊ တရာꩻယို နီအီႏအာႏထွုတ်ဗာႏနေးမုဲင်ꩻ၊ နီအီႏမာꩻဗာႏအနယ်ꩻနုဲင်းမုဲင်ꩻ...?
- တနီꩻနီလဲင်ႏ ဝုဲင်ႏသွော့ဖရာꩻ
- အုံသွော့တရာꩻ(အဆေ့သွတ်ꩻ ဆီမိနစ်)
- လာဗွေ၊ လာမား ထင်ႏသွော့ကျောင်ꩻ
(လိုꩻယဟန်ႏနောဝ်ꩻ လွုပ်ꩻနက်၊ ထုမ်ႏနက်ငါႏ စီꩻပွါꩻတွော့ လာဗွေ၊ လာမား ငါလဲ့ လဲင်ꩻတသေချာဒွုမ် ဝါင်ꩻမိဉ်ႏဟဲ့ꩻထင်ႏကျောင်ꩻကံႏ၊ ဟဲ့ꩻအုံတရာꩻလဲ့ ရိုꩻဒျာႏ ထာꩻမာꩻဖုဲင်ႏတောဝ်း၊ ထာꩻမာꩻသျုပ်ငါႏ၊ ထာꩻမာꩻအာငါႏ၊ နေင်ႏမဲ့တန်၊ လာမဲ့တန်မꩻ ထင်ႏ ရိုꩻဒျာႏလိုꩻနောဝ်ꩻစားလဲ့ အောဝ်ႏထီဖိုအာတန်သွူ...လာဗွေနီꩻတရိုꩻတောဝ်း၊ လာမာနီတရိုꩻတောဝ်း မိဉ်ႏထင်ႏကျောင်ꩻနောဝ်ꩻ ထာꩻမာꩻယို လွစ်ထိုꩻ၊ ကုဲင်ထိုꩻ နောဝ်ꩻမွေးဒျာႏ လာဗွေနီꩻ၊ လာမားနီꩻ ဖုံႏယို လွေꩻမာꩻထာꩻမာꩻတွော့ လꩻစွဉ်ႏရွဉ် နီသွံသိန်ႏ စောင်းမွေးနဲ့....
ထာꩻမာꩻကသျုပ်သား၊ ထာꩻမာꩻကအာသား ဖုံႏနောဝ်ꩻ ကုသိုလ်ႏယို နီအီႏမာꩻဗာႏနုဲင်းမုဲင်ꩻ၊ နီအီႏထုမ်ႏဗာႏအနယ်ꩻနုဲင်းမုဲင်ꩻဖေႏနေးကသေနောဝ်ꩻ ဖေႏသွူအခိန်ႏဆေ့ꩻဆေ့ꩻတွော့ နွို့လွူꩻထွားသွော့ ခွေသွဉ်းကတဲမ်းခါꩻဒါႏ “ #ထုမ်ႏကုသိုလ်ႏအယိုꩻသွတ်ꩻနယ်ꩻ” လိတ်ပွုဒ်နောဝ်ꩻကိုသွူသြ။
(၃) တတိယအရှယျန ထုမျနတရာꩻ
နီနောဝ်ꩻဖြားလဲဉ်းက ထင်ႏကျောင်ꩻ၊ ထင်ႏကံႏ လွေꩻဝုဲင်ႏဖရာꩻယို၊ လွေꩻဝုဲင်ႏဖရာꩻနောဝ်ꩻ၊ လွေꩻလူႏထာꩻယို၊ လူႏထာꩻနောဝ်ꩻ တလွေꩻနွောင်ꩻတောဝ်းဒွုမ်က ကုသိုလ်ႏတရာꩻ၊ ကမ္မဌ္ဋာန်းတရာꩻဖုံႏယို နီအီႏထုမ်ႏဗာႏ အနယ်ꩻနုဲင်းမုဲင်ꩻ...?
- ဖရာꩻလမ်းကိုယို တနီꩻနီလဲင်ႏ ဝုဲင်ႏသွော့
- အုံသွော့တရာꩻ၊ ပွါသွော့ဘာဝါနာ
- ဗွေႏသင်္ဃာႏသီး ကအွဉ်ဗွောင်ꩻဒါႏ ငတ်နီꩻတရာꩻစခန်ꩻ၊ နွတ်ꩻနီတရာꩻစခန်ꩻဖုံႏယို ထွဉ်ႏပိုခို၊ ပိုမူႏပသာဖေႏဟုဲင်း
(ကောကထွာဒါႏ ပိုခို၊ ပိုမူႏဖုံႏလဲ့ နီမွိုး၊ နီဖါသီးယို ဖြားလဲဉ်း ထာꩻမာꩻလမ်းကိုကိစ္စယို အောဝ်ႏလိုႏအွဉ်ႏမာꩻဒွုမ်... ဝွေꩻသီးမိဉ်လူႏတမုဲင်ꩻလူႏ တောမ်ႏစီရဲးမွုန်း... ဝွေꩻသီး လွူးဖွါꩻနီꩻမိဉ်ႏတွိုး လူႏဖေႏသင်္ကန်ꩻ၊ ကပ်ဖေႏသွမ်ꩻ၊ ပင်ꩻသင်္ဃာႏလမ်းကို နာႏဖေႏတရာꩻ၊ အွဉ်ႏနာႏအာအာတရာꩻခွေႏ စတဲင်ꩻဖုံႏယို နီနွောင်ꩻရာꩻ တမျိုꩻမျိုꩻ နီမိဉ်ႏမာꩻဖေႏနောဝ်ꩻ ဝွေꩻသီးနမ်းဖြားအတာႏလဲ့ လꩻတရာꩻ၊ သꩻလဲ့ချံꩻသာႏ၊ နီလဲ့ လꩻကာသိုလ်ႏနေနေသွူ ထာꩻမာꩻနုဲင်းဆꩻကီယိုနောဝ်ꩻ ခုဲင်ႏငါႏ၊ ယပ်ငါႏလဲ့မမွေး၊ လို့အာငါႏလဲ့မမွေး လိုꩻတွိုင်ꩻစွုမ်ႏဖြာꩻရမာꩻနွောင်ꩻဖေႏဒျာႏသွူ..
ထုမ်ႏကုသိုလ်ႏ၊ အာႏထွုတ်တရာꩻသီးအမျိုꩻယိုနောဝ်ꩻ နီထုမ်ႏမꩻနီလꩻ၊ နီအာႏထွုတ်မꩻနီလꩻသွူ... လွေꩻဆေ၊ လွေꩻပွယ်ꩻတွော့ ဖြေꩻသဲင်ꩻပါခွေ ကုသိုလ်ႏ၊ ဖြေꩻသဲင်ꩻပါခွေ တရာꩻနောဝ်ꩻ တရေင်ꩻတာႏ၊ နီရေင်ꩻတာႏငါ ဖေꩻနေး တလꩻတောဝ်းသွူ... မာꩻကုသိုလ်ႏ၊ အာႏထွုတ်တရာꩻဖုံႏ ယိုနောဝ်ꩻ အဗွိုင်နီနာꩻ ကအံႏဒဲဉ်ဟန်ႏသွူ.. ဒဲဉ်ဟန်ႏသီးအမျိုꩻယိုနောဝ်ꩻ နီနမ်းအံႏမꩻ နီနမ်းကွို့မွေးတောဝ်းနဲ့... ပါꩻယိုအံႏတွော့ ပါꩻနောဝ်ꩻဟို့ကွို့ထိုꩻစောင်းမွေးနဲ့... မာꩻကုသိုလ်ႏ၊ အာႏထွုတ်တရာꩻလဲ့ နေးနောဝ်ꩻနေနေ နီမာꩻမꩻနီလꩻ၊ နီအာႏထွုတ်မꩻနီလꩻသွူ..မာꩻပါဖေႏဝါင်ꩻနောဝ်ꩻ တလꩻနွောင်ꩻတောဝ်းသွူ...
အဆုဲင်ꩻသွတ်ꩻအနေႏ နီသက် အောဝ်ႏမွန်ဗန်တွင်ꩻ ယို နွောင်ꩻရာꩻ အဖဲ့ꩻမုဲင်ꩻ တရိုꩻတောဝ်း၊ ကုသိုလ်ႏ၊ တရာꩻဖုံႏ ယို သေမာꩻသွော့ဝါင်ꩻအကျောင်ꩻ.....🙏
အမာႏမိဉ်ႏပါလဲ့ သေနာႏဖေႏသွော့ခွေသွဉ်းသြ
ကားကအောဝ်ႏ ကေꩻဇူꩻတန်ငါႏသွူ...🙏
ခွန်ခမ်းခွꩻ(ဒုံကောင်ထို)
ဒဲဉ်ဟားလာဆန်ꩻ(၁၁)နီꩻ
31.3.2023
No comments:
Post a Comment