နမ်းကျင်ꩻတရာႏဟောဝ်

ယိုတလဲင်ႏ ခွေသွဉ်းအီႏတဲမ်းနယ်ဖော်ႏထန်ႏလုဲင်ႏ ထာꩻရက်ဝတ္ထုတပွုဒ်နဝ်ꩻသွူ
..

ဝတ္ထုကိုကပါဒါႏ လိုꩻရဟန်ႏနောဝ်ꩻ

၁။ ခွန်ကျောႏလွို

၂။ နင်ႏပယွုမ်းခမ်း

၃။ ခွန်ထွိုင်ႏ

၄။ စင်ꩻဖါမောင်ႏ

၅။ နင်ႏမျလေး

ခွန်ကျောႏလွို တွမ်ႏ ခွန်ထွိုင်ႏ ဝွေꩻသီဝင်ꩻနီယို ခိုဗင်ႏတန် နွို့မူႏနံꩻခိုဗင်ႏကွိုင်ကိုလဲ့ ညပသာႏလဲဉ်း မာတဲ့တလꩻဒါႏတဝ်းနုဲင်းနုဲင်းဝင်ꩻ...

ခွန်ကျောႏလွိုယို လိုꩻလိန်ႏမာႏ ၊ လိုꩻအကျင်ꩻစာရိတ္တဟဝ် ၊ လိုꩻကုဲင်း ၊ လိုꩻသွုံꩻစွယ်ꩻဒါႏတဝ်း ယာလံꩻဖေင်ဖင်ꩻ ဒဝ်ထီသူႏရာႏ စတဲင်ဖုံႏနဝ်ꩻသွူ..

ခွန်ထွိုင်ႏတွမ်ႏနင်ႏပယွုမ်းခမ်းယို ထွာတဖူးဝေး ဝမ်းကွဲ..နင်ႏပယွုမ်းခမ်းသီးဖါနဝ်ꩻစင်ꩻဖါမောင်ႏ ဝွေꩻသီးနဝ်ꩻလိုꩻရွဉ်သား ၊ ပွယ်ꩻစာသား...

နင်ႏပယွုမ်းခမ်းယို ၂၀၁၇-၂၀၁၈နေင်ႏ အောင်ႏလꩻခန်းဒျာႏတက္ကသိုလ်ႏနွို့ခွင်ꩻလꩻနဝ်ꩻသွူ..နင်ႏပယွုမ်းခမ်း လိုꩻမူႏယောင်ꩻရေꩻ ဗွိုန်ဗီစွဉ်ႏနင်ꩻလူꩻမူႏခမ်းကီ..

အနေင်ႏနဝ်ꩻ ဗွေႏစင်ꩻသမ်းမာꩻဖေႏယင်း တန်ꩻဆီအောင်ႏသား ၊ တက္ကသိုလ်ႏအောင်ႏသား ၊ အောင်ႏလိတ်ပအိုဝ်ႏသား လိုꩻစားရင်ꩻဖုံႏယိုအီႏဖေႏလွေꩻဆု မာꩻဖေႏပွယ်ꩻတွော့ဗွေႏစင်ꩻထွဉ်ႏကောက်ꩻခန်းခွန်ကျောႏလွိုတွမ်ႏခွန်ထွိုင်ႏ နဝ်ꩻသွူ....

ဗွေႏစင်ꩻသွုပ်ခန်းခွန်ကျောႏလွိုဖုံး

ဟလို ခွန်ကျောႏလွိုနယ်

ဩ မွေးဗွေႏ

ဟန်ႏနေင်ႏခွေအီႏမာꩻဖေႏယင်း ပွယ်ဖေႏအပ်အောင်ႏလိတ်သား နဝ်ꩻမꩻ နာꩻတွမ်ႏခွန်ထွိုင်ႏ နဝ်ꩻလယ်ႏကောက်ꩻဖေႏလိုꩻစားရင်ꩻနော..

ဩလꩻဒျာႏဗွေႏ အခိန်ႏမုဲင်ꩻအွဉ်ႏအဆုဲင်ꩻသွတ်ꩻဗွေႏ

ဒဲဉ်ဟားလာဆန်ꩻ(၁၃)နီꩻအီႏမာꩻဖေႏပွယ်ꩻ ဒဲဉ်ဟားဆန်ꩻ(၈)နီꩻယိုအွဉ်ႏအဆုဲင်ꩻသွတ် ယံကပသာဖေႏနော..

လꩻဒျာႏဗွေႏ မဲ့နီသွဉ်းသီးဝင်ꩻနီလယ်ႏကောက်ꩻဖေႏဩ

နဝ်ꩻတဲ့မွေးသွူ ခွန်ကျောႏလွို

ဩော်ဗွေႏ

နုဲင်းမွူးဟာခွန်ကျောႏလွိုလွေꩻဟဲ့ခန်းခွန်ထွိုင်ႏ

ခွန်ထွိုင်ႏ ခွန်ထွိုင်ႏ ပါꩻယိုအဝ်ႏတဝ်းလမ်းဟောင်း

ပါꩻနဝ်ꩻခွေဟဲ့နာꩻမွော့လဲင်ꩻလဝ်းဒွုမ်လိုꩻကနော

ခွေအဝ်ႏနာႏငဝ်းသချင်ꩻက နာꩻဟဲ့ထာꩻခွေဟွိုန်တဝ်း

ယိုပါꩻနဝ်ꩻ နီဒုံဟန်ႏနေင်ႏ တန်ꩻဆီအောင်းသား ၊ တက္ကသိုလ်ႏအောင်ႏသား ၊ လိတ်ပအိုဝ်ႏအောင်းသား အာနေႏနယ်း..

ဟန်ႏနေင်ႏ တန်ꩻဆီအောင်ႏသားနဝ်ꩻ ဝင်ꩻသွစ် ၊ တက္ကသိုလ်ႏအောင်ႏသားနဝ်ꩻ ဝင်ꩻသွံကွေး..

ယိုမိဉ်ႏတွိုႏဒဲဉ်ဟားဆန်ꩻ(၁၃)နီꩻယို နီဗွေႏစင်ꩻအီႏမာစဖေႏယင်း ပွယ်ꩻအောင်ႏလိတ်သား ပွယ်ꩻဖေႏအပ်ဆုတဲင်ခွေတွမ်ႏနာꩻလယ်ႏကောက်ꩻဗာႏလိုꩻ စားရင်ꩻဗွေႏစင်ꩻထွဉ်ႏနေးနဝ်ꩻ..

လꩻဒျာႏအီ မွူးဟာခိုႏတခိင်ႏတွမ်ႏမွူးရဝ်ꩻခိုႏတခိင်ႏမဲ့ နီလယ်ႏကောက်ꩻနုဲင်းနုဲင်းဝင်ꩻလꩻဒျာႏ..

မွူးတဲ့ဟာပသာႏလဲဉ်း ဝင်ꩻလွေစခြမ်ဖုံႏလဲ့ ရသဲင်ꩻလဲဉ်းယင် နီလယ်ႏကောက်ꩻခန်းနယ်တဲ့..

လꩻဒျာႏနဝ်ꩻတဲ့ခွေထူႏကလိတ်အုပ်ဖုံႏယို..

လꩻလꩻ

ခွန်ကျောႏလွိုတွမ်ႏခွန်ထွိုင်ႏလယ်ႏကောက်ꩻခန်းဒျာႏလိုꩻ စားရင်ꩻ တွိုႏလွေꩻခန်းဒျာႏ နင်ႏပယွုမ်းခမ်းသီးလမ်း..

စင်ꩻဖါမောင်ႏ နင်ႏပယွုမ်းခမ်းအဝ်ႏတဝ်းလမ်းနယ်

အဝ်ႏမောင်ႏ အုံလမ်းကိုယိုလုဲင်း

ဖြားမောင်ႏ နင်ႏပယွုမ်းခမ်း အောင်ႏတန်ꩻဆီနဝ်ꩻဂုဏ်ထူး ပါမွေးနေႏ..

မွေး ပါသွံဗာႏ

ဒါႏငါႏနော သꩻရေꩻကိုငါႏ

ခွန်ထွိုင်ႏ သီဒေါ့ꩻကီဝင်ꩻတွင်ꩻ နင်ႏပယွုမ်းခမ်းအီလွဉ်ခန်းနိန်းထီ  သမ်းကꩻစွဉ်ႏဆဲင်ꩻ ဝမ်းဆက်ရွစ် ၊ ကလူꩻဝွေႏလဲ့သမ်းချလင်ꩻနေး ၊ ဒင်ႏပါစွဉ်ႏ မွန်းကြိုႏကြိုႏ..

ဩ ဝေးထွိုင်ႏသီးဒျာႏနယ် ဖူးမူႏအောင်ႏလဲဉ်းတန်ꩻဆီ ဝေးထွိုင်ႏအီႏဖြေꩻဖေႏ ဖူးမူႏလက်ဆောင်ႏတမုဲင်ꩻ

ဖူးမူႏအောင်ႏလဲဉ်းက ဖြေꩻလွူးနီတခိုးမွိုင်အီ

လꩻလꩻ မွူးရဝ်ꩻမꩻမွိုင်အယ်

ဖူးမူႏယိုခါမွော့ယောင်ꩻရေꩻငါႏအယ် 

ဝေးထွိုင်ႏဖူးမူႏကယောင်ꩻရေꩻအယ် ကွယ်တွော့ထွꩻနယ်ဝေးထွိုင်ႏသီးဝင်ꩻမူႏ ဟယ်

အတွင်ꩻနဝ်ꩻခွန်ကျောႏလွိုတဖြာꩻ စငါထီႏစစနင်ႏပယွုမ်းခမ်းလွိုးနဝ်ꩻမဲ့ꩻယိုထဲင်းထင်းဒွုမ် ထွားစွူဖြွိုးစွဉ်ႏဒျာႏ..

စင်ꩻဖါမောင်ႏဖြာꩻ.

ယိုပိုမူႏထွားသော့ꩻပါနိန်းထီနဝ်ꩻနော နီဖါလွေꩻထူႏကရွဉ် စင်ꩻဖါအိုးထျꩻယို သာႏသာႏယာႏယာႏဒျာႏနောမောင်ႏ..

မွေးသြ

ဝေးထွိုင်ႏသီလွဉ်လယ်ႏမို့ꩻမို့ꩻဒျာႏရိုးအယ် ကိစ္စအဝ်ႏနယ်

ဟန်ႏနေင်ႏဗွေႏစင်ꩻအီႏမာꩻဖေႏယင်း အောင်ႏလိတ်သား ပွယ်ꩻဖေႏဆုတဲ့ ထွဉ်ႏကောက်ꩻလိုꩻစားရင်ꩻ..

နယ် ဟန်ႏနေင်ႏပေါင်းအာနော

မွေး...

ခွန်ထွိုင်ႏသီး ဒေါ့ꩻရီဝင်ꩻညပသာႏ ခွန်ထွိုင်ႏရိုꩻခန်း

နဝ်ꩻတဲ့နီလွေꩻငါငါထဲင်းကယိုဖူးမူႏ မွူးရဝ်ꩻနီꩻမꩻနီခွဲယင်းဝင်ꩻ

အွူမွေးသွူ မွူးရဝ်ꩻမꩻလွဉ်မဲဉ်ႏမဲဉ်ႏနော မဲ့ခွေဖြေꩻလွူးသီ တခိုး

မွေးသွူ ကေꩻဇူꩻတင်ႏငါႏဖူးမူႏ လွေꩻသွူနော

ဩ ဩ

ခွန်ကျောႏလွို တွမ်ႏ ခွန်ထွိုင်ႏသီးလွေꩻကောက် တေားတေားခန်းဒျာႏအလမ်းလင် ဝွေꩻသီဝင်ꩻနီအဝ်ႏသဲင်ꩻတဖူꩻလောင်းတွင်ꩻ ခွန်ကျောႏလွိုရီခန်းခွန်ထွိုင်ႏနုဲင်းယို

ယိုပါꩻနဝ်ꩻနာꩻဖူးမူႏယိုခါမွော့တရေꩻငါႏနဝ်ꩻအယ် မိတ်ဆက်ဖေႏတဝ်းလိုꩻကနော

မွူးရဝ်ꩻနီꩻမꩻသာႏယာႏမွိုင်ဟွေး မွူးရဝ်ꩻနီꩻလွꩻလွဉ်ꩻယင်းခွေနော နင်ႏပယွုမ်းခမ်း ဖြေꩻလွူးနီတခိုးတဲ့ တွိုႏအခိန်ႏနဝ်ꩻခွေမိတ်ဆက်ဖေႏနာꩻ

ဒေါ့ꩻမွေးဒျာႏရိုးအယ်

နာꩻတွမ်ႏခွေအုံညီꩻဝင်ꩻအွိုးပေႏပေႏခါကာႏနဝ်ꩻဟွေး ခွေလဲဉ်ဖိုနာꩻအဝ်ႏမုဲင်ꩻ

မွေး နဝ်ꩻတဲ့အနီꩻလင်မꩻနီလယ်ႏကောက်ꩻယင်း ဟန်ႏဟာနဝ်ꩻမွူးတဲ့ခေ့ꩻပသာႏလဲဉ်း နီသဲင်ꩻတွမ်လမ်းယို 

သဲင်ꩻဗေင်ႏမွန်းဗော့ꩻခွယိုပါꩻနဝ်ꩻ

လꩻလဲဉ်း မဲ့နီမွိုးဖါအဝ်ႏနန်းလိုꩻလမ်း

မွေးသွူသွꩻ နဝ်ꩻတဲ့သဲင်ꩻယွꩻယွꩻနော

မွေးသွူ

ခွန်ကျောႏလွိုတဖြာꩻသဲင်ꩻတဖူꩻလောင်းတွင်ꩻ ဝွေꩻမဲ့ကိုယိုအဝ်ႏထီႏယောင်ႏဗော့ꩻ နင်ႏပယွုမ်းခမ်း လွိုးလွုမ်ꩻ တွိုႏလမ်းတဲ့အဝ်ႏယူႏ ဝုဲင်ႏဖရာꩻလဲ့ဝုဲင်ႏဗော့ꩻအဒွေါင်ႏစားလွုမ်ꩻ ဗေင်ႏထာꩻလဲ့ခေင်ꩻခင်ꩻဒွုမ် ဝွေꩻသꩻနဝ်ꩻအဝ်ႏမောင်ႏ လဲဉ်းသွူမွူးရဝ်ꩻနီꩻတွိုႏ...

တွိုႏခန်းမွူးရဝ်ꩻစဝ်းခွန်ကျောလွိုးလွေꩻဟဲ့ခန်း

ခွန်ထွိုင်ႏ ဝွေꩻသီးဝင်ꩻနီ နဝ်ꩻတရဝ်ꩻလွေꩻကောက်ꩻဒွုမ် လိုꩻစာႏရင်ꩻတွာ့ လွေꩻခန်း နင်ႏပယွုမ်းခမ်း သီးလမ်း...

နင်ႏပယွုမ်းခမ်း တဖြာꩻရိုꩻခန်းအဖါနုဲင်းယို 

နီဖါဟန်ႏနီꩻပိုမူႏသီး အီႏထင်ႏလယ်ႏဝေင်ꩻ

တွမ်ႏပိုမုဲင်ꩻအယ်ပိုမူႏ

တွမ်ႏဝေးထွိုင်ႏသီးဒျာႏ

တွမ်ႏဝေးထွိုင်ႏသီးနဝ်ꩻကလွေꩻလွဉ်ꩻအဝ်ႏလꩻဒျာႏ နုဲင်းလိုꩻလင်တဲ့နီဖါအွဉ်ႏစွꩻတဝ်း..

ဩဩ ဟနျနနီꩻနီဖါအဝျနလိုနနနေကာꩻ

လိုႏတဝ်းပိုမူႏ မဲ့နီဖါလင်ꩻဗော့ꩻတွမ်ႏဆိုင်ကယ်

နဝ်ꩻနဲ့ပိုမူႏဖူႏလွေꩻ ဖေႏဗဲင်းပါပိုမူႏရွဉ်ဆေ့ꩻဆေ့ꩻမွိုင်ဖါ

ပိုမူႏလိုႏခွိုန်းမုဲင်ꩻပိုမူႏထူႏဒျာႏနဝ်ꩻ နီဖါအီႏလင်ꩻစဝ်းကပွယ်ꩻရျွမ်ꩻယို ဝါးယွယွသွော့ကာꩻနော ပိုမူႏသွꩻမူႏပါတဝ်းနယ်

နင်ႏမြလေးပါ ကာꩻတဲ့ထွဉ်ႏဝါးဒျာႏဝေးထွိုင်ႏ ဖါ ပိုမူႏဝါးတဝ်း

ဟဝ်ငါႏ သဲင်ꩻစဝ်းစဝ်းဒျာႏနော 

ဩဖါ

နဝ်ꩻတဲ့နီဖါလင်ꩻသွူ..

စင်ꩻဖါမောင်ႏလဲ့လင်ꩻထိုꩻခန်းဒျာႏပွယ်ꩻရျွမ်ꩻ

ခွန်ထွိုင်ႏတွမ်ႏခွန်ကျောႏလွိုတဲ့ဖျော်လွဉ်ခန်းနင်ႏပယွုမ်းခမ်းထျꩻ ဝွေꩻသီးဝင်သွံဒေါ့ꩻရီဝင်ꩻတဆင်ꩻစွုမ်ႏထွူ လွေꩻဟဲ့မဝ်ခန်းဒျာႏနင်ႏမြလေး ဝွေꩻသီးဝင်ꩻလစ် ထင်ႏလယ်ႏခန်းဝေင်ꩻ ၊ လယ်ႏဝုဲင်ႏဖရာꩻ၊ ယဲက်ညီခန်းဝင်ꩻအမှတ်တရဓာတ်ပွုံႏ ၊အုံလင်ꩻပဆား ဆဲင်ႏတန်ကိုအံႏအွꩻခန်းဒဲဉ်ဟန်ႏ ဖျော်ထီဝွေႏဖုံႏ ၊ မိတ်ဆက်လူႏလုဲင်းခန်းဝင်ꩻမဉ်ꩻ  ခွန်ကျောလွိုတဖြာꩻ ကွီခန်းဒျာႏနင်ႏပယွုမ်းခမ်းဖုံးမုဲင် တွမ်ႏ (Facebook)အကောင့် စွုမ်ႏလယ်ႏထာꩻစွုမ်းကွို့မွူးလဲ့လင်ꩻဖွိုႏပသာ သဲင်ꩻချာခန်းဝင်ꩻလမ်းပငါပရာနဝ်ꩻသွူ..

တယ်ႏစအနီꩻနဝ်ꩻမာꩻငါ ခွန်ကျောႏလွိုတဖြာꩻ ဒေါ့ꩻရီလွေꩻနင်ႏပယွုမ်းခမ်း ဖုံးကိုခါႏခါႏ လဲင်းလောင်းခါႏခါႏ မွူးနီꩻပေါင်ꩻထွိုင်ႏည လာပေါင်ꩻထွိုင်ႏညဆွာꩻတွော့. နင်ႏပယွုမ်းခမ်းလဲ့ ရီခန်းခွန်ကျောႏလွိုအကျောင်ꩻခရာႏ ခွန်ထွိုင်ႏထျꩻ..

နင်ႏပယွုမ်းခမ်းတဖြာꩻထွိုင်ႏသေထွꩻခွန်ကျောႏလွိုအကျောင်ꩻခရာႏတွာ့ ဒေါ့ꩻနယ်ခြဲင်းနယ်ခန်းဒျာႏအဖါ..

စင်ꩻဖါမောင်ႏလဲ့ ခွန်ကျောႏလွို ယိုလိုꩻနုဲင်းမုဲင်ꩻစား လိုꩻအကျင်ꩻစရိတ္တဟဝ်နဲ့ဟဝ်းတဝ်းနဲ့နဝ်ꩻ လိုꩻလဲင်သေထွꩻလို့တဒုံလွုမ်းလွုမ်း လိုꩻနုဲင်းခွန်ကျောႏလွိုသီးယို လိုꩻခိုယမ် လိုꩻခိုလိန်ႏမာႏ လိုꩻအကျင်ꩻစာရိတ္တဟဝ် နုဲင်းခေတ်ယိုတဗာႏ လိုꩻရွဉ်ခံလွိုင်ႏ လိုꩻယောင်ꩻဆင်ꩻယမ်သားလဲ့အဝ်ႏ ဗောႏဗာႏ ကွယ်ꩻတွော့လိုꩻအကျင်ꩻစာရိတ္တဟဝ် နုဲင်းခွန်ကျောႏလွိုယို ခြေင်းငါႏ နဝ်ꩻမꩻတွိုႏတနီꩻနီꩻခွေပိုမူႏမိဉ်ႏကျွိုက်မွေးဒျာႏဝွေꩻနဝ်ꩻ ရွဉ်မဉ်လို့တခွိုန်းမုဲင်ꩻလို့ ခွေခမ်ႏထေဖေႏဒျာႏ သꩻကိုအဝ်ႏယူႏခါꩻလဲဉ်းနေးနဝ်ꩻ...

ခါႏနီꩻသွံနီꩻနင်ႏပယွုမ်းခမ်းထွိုင်ႏသေထွꩻလို့လို့ ခွန်ကျောႏလွို အကျောင်ꩻခရာႏလဲ့ခွန်ကျောႏလွို

ကကွီဒေါ့ꩻဒါႏ ငဝ်းရက် ဖုံႏနဝ်ꩻလဲ့နင်ႏပယွုမ်းခမ်းလဲ့လက္ခႏခန်းဒျာႏနဝ်ꩻသွူ..

တွိုႏခန်းလာဗွေဟာ ခွန်ကျောႏလွို လွေꩻဟဲ့ခန်းခွန်ထွိုင်ႏ 

ပါꩻနဝ်ꩻ 

ဟွေး ခွန်ကျောႏ

ဟန်ႏဟာပသာခွေ နင်ႏပယွုမ်းခမ်းသီးလမ်းလꩻနေႏဟောင်း လယ်ႏခါႏခါႏမူႏနံꩻယို

နာꩻငဝ်းတန်နဝ်ꩻ နာꩻစောင်းလယ်ႏဖိုမူႏနံꩻဟောင်း

တွိုႏခွေဟဲ့နာꩻပွိုင်းလဲင်ႏနဝ်ꩻနာꩻတလွေꩻဖိုတဝ်း ဟန်ႏဟာမွော့ဆန်ꩻငါႏနဝ်ꩻအယ် နာꩻလꩻလဲဉ်းအဖြေႏဝွေꩻထျꩻနဝ်ꩻ

စငါလꩻမဟာနီꩻ ပသာဖေႏဒျာႏရိုးအယ် ခွေတဲ့ဒေါ့ꩻသေခါꩻလဲဉ်းဝွေꩻ

ပသာဖေႏလꩻဒျာႏအယ်ပါꩻနဝ်ꩻ နန်းမွုန်း

သေႏချာႏဒျာႏရိုး

ခွေလဲဉ်ဖိုနာꩻစောင်းအဝ်ႏဟောင်းသွပေႏ မွူးဟာမꩻလွေꩻဟဲ့စဝ်းစဝ်းဗော့ꩻခွေနဝ်ꩻ

လꩻလꩻ ကေꩻဇူစတငနြငါနပါꩻနဝြꩻ

လꩻဒျာႏအယ်ဟွေး အချင်ꩻချင်ꩻဒျာႏတဲ့

နဝ်ꩻတဲ့နီလွေꩻတယ်ꩻခန်းနယ် အခိန်းယို စင်ꩻဖါမောင်းသီးလဲ့အံႏအွꩻရထွူလဲဉ်းယင် 

လွေꩻခန်းတဲ့လꩻဒျာႏ

ဝွေꩻသီးဝင်ꩻနီꩻနဝ်ꩻတဟာလွေꩻလယ်ႏခန်း နင်ႏပယွုမ်းခမ်းသီးလမ်း 

နင်ႏပယွုမ်းခမ်း ဗေင်ႏလဲဉ်းထာꩻဟောင်း

ဩဝေးထွိုင်ႏသီးဒျာႏနယ် အုံလမ်းကီယိုဟုဲင်း

စင်ꩻဖါမောင်ႏဗေင်ႏလဲဉ်းထာꩻနဝ်ꩻ

နီဖါအဝ်ႏထွားတီဗွီလွိုး အုံပွေါးတဆင်ႏ ခွေလင်ꩻထူႏဖေႏသီနိန်းထီ 

လꩻလဲဉ်းဖူးမူႏ နီအံႏလွဉ်ဒဲဉ်ဟို့ဗွေဗုဲင်လဲဉ်း မာꩻခုဲင်းမွုန်းဒွုမ်

အမျိုꩻအီႏမွေးနဲ့ တဆင်ႏနော

အွူအွူ

ဝွေꩻသီးဒေါ့ꩻရီဝင်ꩻတဆင်ႏစင်ꩻဖါမောင်ႏလဲ့ဗေင်ႏထိုꩻ ခန်းဒျာႏထာꩻ..ခွန်ထွိုင်ႏသီးဝင်ꩻသွံအုံမွန်းဒေါ့ꩻရီဝင်ꩻညပသာႏ ခွန်ထွိုင်ႏရိုꩻခန်း..

ခွန်ကျောႏလွို ခွေသဲင်ꩻသွူနော နာꩻဒေါ့ꩻရီသာႏယာႏဒျာႏ

သာနယာနမှိုငျဟှေ အုံကသာနယာနလꩻဒြာန

ဟန်ႏဟာဗေင်ႏစဝ်းစဝ်းခါႏထာꩻဟောင်း

မွေးသွူသွꩻ သဲင်ꩻတဖြာꩻဗွိုန်ႏဒျာႏရိုးအယ်

အုဲင်းချီ နာꩻပါလဲ့ဗွီုန်ႏဗွိုန်ႏ

ဟားဟား မွေးဒျာႏသာႏယာႏနော

မွးသွူသွꩻ သဲင်ꩻသွူနောဖူးမူႏ 

ဩ ဝေးထွိုင်ႏ

ခွန်ထွိုင်ႏလဲ့သဲင်ꩻထိုꩻခန်းဒျာႏလမ်း ခွန်ကျောႏလွိုရိုꩻခန်း နင်ႏပယွုမ်းခမ်းနုဲင်းယို

ဖူးမူန 

နီဝေးနဝ်ꩻရွဉ်ခမ်ꩻဂုဏ်ႏပကာသနလဲ့တအဲဉ်ထဝ်းနုဲင်းဝင်ꩻ ယောင်ꩻဆင်ꩻလဲ့တရေꩻတဝ်းနုဲင်းဝင်ꩻ ပညာႏလဲ့တဗွေစွုမ်ႏတဝ်းနုဲင်းဝင်ꩻ ဝင်ꩻကျွိုက်ဝင်ꩻရက်သားလဲ့တအဝ်ႏတဝ်း

ဖူးမူႏအဝ်ႏနဝ်ꩻအယ်ဝေး နီဖါရိုꩻဖိုဖူးမူႏ ခေတ်ယိုခါနဝ်ꩻ လိုꩻရွဉ်ခမ်ꩻအဝ်ႏအာသားလဲ့ အကျင်ꩻစာရိတ္တ တဟဝ်ထွꩻတဝ်းနီဝေး လိန်ႏမာႏလဲ့ထွꩻတဝ်းနီဝေး ထာꩻသေထာꩻဒါႏလဲ့ထွꩻတဝ်းနီဝေး လိုꩻခိုနုဲင်းခွန်ကျောႏလွိုယို ခြေင်းငါႏတဲ့ ပိုမူႏမိဉ်ႏကျွိုက်ဒါႏငါဝွေꩻငါ နီဖါသေဖာ်ꩻတူႏဒျာႏတဲ့ 

ကေꩻဇူꩻတငနြငါနဖူးမူန

လိုꩻယဟန်ႏနဝ်ꩻအဝ်ႏကရိုးဖူးမူႏ တေားလမ်းပေႏပါႏထာꩻ အိန်ႏထောင်ႏရေꩻအယပ်အခုဲင်ႏလဲ့မသေ နီဘဝအနာဂါတ်တာႏ ယံဖေႏကတရေ  ၊ နီအီႏတွူႏတရန်လွေꩻဗာႏအနယ်မုဲင်ꩻ ၊နီအိန်ႏထောင်ႏရေꩻဖေႏနေးကမွန်ဗန်တသေႏသေႏ နီအီႏကျိုꩻဆောင်ႏဗာႏ နေးမုဲင်ꩻလဲ့မသေ တေားလမ်းဝင်ꩻစငါလꩻနီနေင်ႏသွ့ယံနေင်ႏ အိန်ႏထောင်ႏရေꩻအဆင်ႏပြေႏတဝ်း ငဝ်းအာဝင်ꩻ ၊ မွိုးဖါဖူးဝေးလဲ့ သꩻယပ်ကို ၊ အွဉ်ႏကုဲင်ချာဝင်ꩻ ဖုံႏနဝ်ꩻ အဝ်ႏအာတန်ကရိုး စွုမ်ႏအွဉ်ႏကုဲင်လဲဉ်းဝင်ꩻယို မဉ်ꩻလဲ့မအွီႏ ပိုမိဉ်ႏအဝ်ႏပါထဲင်းနဝ်ꩻ ယိန်းခုဲင်ႏခုဲင်ႏ မုဲင်းရင်းဗာႏထာꩻလဲ့မဉ်ꩻမအွီႏ...

မွေးဝေး ဖူးမူႏသွꩻမူႏကိုတဲ့အဝ်ႏထီႏဝေး

နဝ်ꩻမꩻတေားလမ်းဒျာႏသွော့နုဲင်းနီဝေးယိုနော ဟယ်

ဒေါ့ꩻငဝ်းလဲ့ကသမ်းဒါႏ 

လိုꩻခိုယိုခါ ကဲဉ်းအာအာ

သွဉ်အွꩻဒါႏစွဉ်ႏ ဒဝ်ဘီယာ

လိုꩻခိုယိုခါ ကဲဉ်းအာအာ

သွဉ်အွမ်ဒါႏစွဉ်ႏ ပြူးကွမ်းယာ

လိုꩻခိုယိုခါ ကဲဉ်းအအာ

သွဉ်ဆွဉ်းဒါႏစွဉ်ႏ ယာလိတ်ဗွာ

လိုꩻခိုလိန်ႏမာႏ လိုꩻခိုအကျင်ꩻစာရိတ္တဟတ် နုဲင်းနီဝေးနဝ်ꩻ ခြွော့ꩻငါႏ နဝ်ꩻမꩻ နီဝေးယိုဖူးမူႏအရက်သွတ်ꩻ ဖူးမူႏအနာႏဂါတ်အတာႏ ထွာဒျာႏဆာႏတပွင်ꩻ နီဝေးနဝ်ꩻထွာဒျာႏဖူးမူႏအသက် 

ရွဉ်ခမ်ꩻယို လုဲင်ႏစွဉ်ႏနီအကျင်ꩻစာရိတ္တတလꩻတဝ်း လိုꩻရွဉ်ခမ်ꩻအာသားယဟန်ႏလဲ့ အကျင်ꩻစာရိတ္တတဟဝ် တဝ်းနဝ်ꩻအဝ်ႏထီဖိုအဝ်ႏဗောဗာႏထာꩻ..မိဉ်ႏဒေါ့ꩻလဲ့တလို့ ဒါႏတဝ်းဖူးမူႏ မွူးလဲ့ခေ့ꩻပသာႏလဲဉ်း နီဝေးသဲင်ꩻသွူနော ဆုဲင်ꩻမꩻနီဝေးလွဉ်လယ်ႏယင်းနော

မွေးသွူဝေး သဲင်ꩻယွယွနော ရက်ငါႏနီဝေး

နီဝေးလဲ့ရက်ငါႏဖူးမူႏ

ဘိုင့်ဘိုင်

ခွန်ကျောႏလွိုလဲ့သဲင်ꩻချာခန်းလမ်း နင်ႏပယွုမ်းခမ်းလဲ့စွုမ်ႏဟွိုန်ထဲင်းဗာႏယင်း ခွန်ကျောႏလွိုငဝ်းဖုံႏနဝ်ꩻ ဝွေꩻသꩻလိန်းပျောႏပျောႏ ...ခွန်ကျောႏလွိုလဲ့စုသေခါꩻခန်းရွဉ် ကျိုꩻစာꩻထာꩻမာꩻစွုမ်ႏနီꩻနီꩻ နင်ႏပယွုမ်းခမ်လဲ့ ထင်ႏထိုꩻခန်းကျောင်ꩻတက္ကသိုလ်ႏပထမနေင်ႏ ဝွေꩻထင်ႏကျောင်ꩻတွင်ꩻ ဝွေꩻသꩻနဝ်ꩻအဝ်ႏဗော့ꩻဒျာႏခွန်ကျောႏလွိုထျꩻ ဝွေꩻသီးဝင်ꩻနီ ဒေါ့ꩻရီဝင်ꩻဖုံးကိုစွုမ်ႏနီꩻနီꩻ စွုမ်ႏဟာဟာ တွိုႏအနီꩻနဝ်ꩻ စင်ꩻဖါမောင်ႏလင်ꩻပွယ်ꩻရျွမ်ခွဲတောက် ခန်းခွန်ကျောႏလွို

ယိုခွန်ကျောႏလွို နာꩻအီႏလွေꩻမုဲသ်ꩻဟန်ႏနီꩻ 

သေတဝ်းဒွိုန်းယို စင်ꩻဖါမောင်ႏ

နဝ်ꩻတဲ့လင်ꩻလွဉ်ꩻဗော့ꩻခွေပွယ်ရျွုမ်ယို ပွယ်ꩻရျွုမ်ကိုလဲ့ ထာꩻမာꩻအဝ်ႏလိုႏမာꩻအဝ်ႏအာတန်

စင်ꩻဖါမောင်ႏဒေါ့ꩻမွေးဒျာႏနယ်

ဒေါ့ꩻမွေးဒျာႏ နာꩻအုံတငါꩻလဲ့အဝ်ႏလꩻလꩻ

ခွန်ကျောႏလွိုလဲ့ မာꩻတငါခန်းထာꩻမာꩻ စင်ꩻဖါမောင်ႏပွယ်ꩻရျွုမ်ကို ကျိုꩻစာစမွးထာꩻမာꩻ စားရင်ꩻလဲ့တွက်မဲဉ်ႏ လဉ်အံႏ လိန်ႏအံႏ တဝ်းဝင်ꩻ စင်ꩻဖါမောင်ႏလဲ့ကျွိုက် စင်ꩻဖါမောင်ႏယူးခန်း

ပါꩻပေႏခွန်ကျောႏလွိုယို လိုꩻလိန်ႏမာႏ လိုꩻအကျင်ꩻစာရိတ္တဟဝ် ခွေပိုမူႏကျောင်ꩻမိဉ်ႏထွူမꩻ ခွေဖေႏတောႏလမ်းသွူစွဉ်ႏတလဲဉ်ႏချင် ရွဉ်မိဉ်လို့ခွုန်းမုဲင်ꩻလို့..တနေင်ႏစွုမ်ႏဗွေ နင်ႏပယွုမ်းခမ်း လဲ့သဲင်ꩻချာခန်းလမ်း..နဝ်ꩻတဟာချင်ꩻ ခွန်ကျောႏလွို လွေꩻလယ်ႏသွူစွဉ်ႏ စင်ꩻဖါမောင်ႏသီးလမ်း..

ဖူးမူႏသီးထင်ႏကျောင်ꩻရပျောႏငါႏနော

ပျောႏတဝ်းဝေး နီဝေးမိဉ်ႏပါမꩻပျောႏ

ဘဝအခေႏနေႏဗွိုန်တဝ်းဝင်ꩻကနော

သꩻတွမ်ႏပေႏမွုန်းဝေး ယူးမွုန်းမုဲင်ꩻမုဲင်ꩻ

ဖူးမူႏထင်ႏကျောင်ꩻနဝ်ꩻ အဝ်ႏကုဲင်က သွံနေင်ႏနော 

မွေးဝေး နီဝေးအုံပွေါးနွေင်တဝ်းဖူးမူႏနဝ်ꩻ

မွေးတဝ်းအယ်ဖူးမူႏ ဖူးမူႏမိဉ်ႏထင်ႏကျောင်ꩻနီဝေးငမ်းငါႏ ထီႏတေားမော့ꩻတေားယင်းလိုꩻခိုလင်ရွဉ်ခံꩻသားဒျာႏ

ယူးမွုန်းနေးနဝ်ꩻဝေး နီဝေးသꩻသွော့တဝ်းဖူးမူႏနယ်

အင်း ဖူးမူႏနဝ်ꩻနီဝေးရေႏရွယ်ႏခါꩻလဲဉ်းတစိုးသက်

ဗီဗီဝေး ဖူးမူႏလဲ့နုဲင်းနုဲင်း ဖူးမူႏလဲ့အဝ်ႏမောင်ꩻလဲဉ်းကျောင်ꩻထွူနေနေ ကျောင်ꩻမိဉ်ႏထွူနဝ်ꩻမꩻ တေားလမ်းသွူစွဉ်ႏ တလဲင်ႏချင်ꩻနောဝေး နီဝေးလဲ့စုသေခါꩻခန်းရွဉ် လိုꩻမူႏလင်လဲ့တွမ်ႏထီႏတေားမွိုန်းဒွုမ် 

ဩ ရက်ငါႏဖူးမူႏ

ဖူးမူႏလဲ့ရက်ငါႏနီဝေး

မွူးနီꩻပေါင်ꩻထွိုင်ႏအာ လာပေါင်ꩻထွိုင်ႏညဆွာꩻ နင်ႏပယွုမ်းခမ်းလဲ့ကျောင်ꩻ စွုမ်ႏထွူ စင်ꩻဖါမောင်ႏလဲ့ မာꩻဖေႏခန်းအပိုမူႏပွယ်ꩻပင်ꩻမင်္ဂလာႏ ခွန်ကျောႏလွိုတွမ်ႏနင်ႏပယွုမ်းခမ်းသီးဝင်ꩻနီလဲ့ နဝ်ꩻတနီꩻဝွေꩻသီးအတာႏထွာစွဉ်ႏအပျောႏမွူးနီꩻသွူ....

အမာႏမိဉ်ႏပါလဲ့ ခွင်ꩻလွစ်သွော့ဩ

ကားကအဝ်ႏကေꩻဇူꩻတန်ငါႏသွူ

ခွန်ခမ်းခွꩻ(ဒုံကောင်ထို)

၁၄-၁၁−၂၀၂၀

-----------------အွဉ်ႏသွတ်ꩻ--------------------