“သျောင်ႏကံဒါႏဒါႏ ဒဝ်သူႏရာႏ”
-----------------------------
👀ခွေသွဉ်းကထီႏဖို ကွပ်စွဉ်ႏဒဝ်တွော့ꩻခံႏစာꩻဗာႏ အကျိုꩻကုဲင် လိုꩻယဟန်ႏနဝ်ꩻ မိဉ်ခြုဲင်းနယ်ငါႏ သွူ။ ပါꩻတဖြာꩻ မာꩻထာꩻမာꩻတနီꩻလꩻရွဉ်နွိုတ်ရေင် ၊ သွစ်ꩻရေင် ..... အဝ်ႏထာꩻမာꩻ သဲင်ꩻမွူးဟာ သဲင်ꩻနွို့မဝ်ꩻဗော့ꩻဒဝ်ဆဲင်ႏ စွုမ်ႏဟာဟာ ယဟာဟာနဝ်းမော့ꩻသွꩻပေႏဖုံႏ တွော့ꩻ တနီꩻတာႏဝွေꩻကလꩻရွဉ်ယို သွုံꩻလို့ အွꩻလို့ဗော့ꩻဒဝ်၊ လမ်းကိုဝွေꩻပိုမာ တာႏယို ဝွေꩻတသေယူႏတဝ်း... ပေါ်တွိုႏသဲင်ꩻလမ်း မွန်သဲင်ꩻဗော့ꩻဒဝ် ထုမ်ႏရွို့ပိုမာ ....နုဲင်းယိုနဝ်ꩻ အိန်ႏထောင်ႏရေꩻ သာႏယာႏနွောင်ꩻနေ ဟောင်း ထိခွိုက်မွေးငါႏ ပိုမာ ၊ ပိုမာꩻတဲ့သꩻဆင်ꩻရယ်ဗာႏမွေးသွူ....
လိုꩻယဟန်ႏနဝ်ꩻပေါ်အွꩻဗာႏတဝ်းဒဝ်နဝ်ꩻငဝ်းအဝ်ႏ တဝ်း အွꩻဗာႏသွူဒဝ်နဝ်ꩻ ငဝ်းအာသွူ ထုမ်ႏရွို့သွူ ပါꩻ ခွန်းထွမ်လော်လယ်သွူထာꩻ..အွꩻတေ့တေ့နဝ်ꩻ တမွေးတဝ်း....
🇲🇲🇲🇲ထွားဒျာႏနီမန်းခမ်းကို ဝေင်ꩻကို၊ ဒုံကို ၊ ရပ်ကို ၊ ယဟန်ႏနဝ်ꩻ ကွပ်စွဉ်ႏဒဝ်တွော့ꩻ မိသားစုအကို သꩻဆင်ꩻရယ်ဗာႏ ၊ နမ်းဆင်ꩻရယ်ဗာႏ ၊ မော့ꩻထာꩻခုဲင်ႏ စတဲင်ဖုံႏအဝ်ႏထီႏဗာႏနဝ်ꩻ သꩻပေႏခရာႏတန်သွူ။ အွꩻဒဝ်သားတဲ့နဝ်ꩻ မိသားစုသားတဲ့နဝ်ꩻ ထိခွိုက်ငါႏ ပညာႏရေꩻ ၊ ကျံႏမာႏရေꩻ ၊ လိုꩻမုရေꩻအကိုမဲ့ငါပေႏဗာႏငါႏ နဝ်ꩻသွူ။😞😞😞
“ကလားကာအွꩻဒဝ်နဝ်ꩻ”
-------------------------
နုဲင်းခွေသွဉ်းကာယူႏ ကလားကာအွꩻဒဝ် တကောက်ꩻ ၊ ဘီယာတကောက်ꩻနဝ်ꩻ နီဖြေꩻဖေႏ ဗော့ꩻနီပိုအတာႏ တခိုးတရိုꩻတဝ်း🍔 ၊ အာဟာႏရအဝ်ႏ ထာꩻအံႏတမျိုꩻမျိုꩻယဝ်း🍱 ၊ လိုꩻပေႏအတာႏ ပါက်သက်တွမ်ႏလိတ်လုဲင်ꩻ 📚၊ လိတ်စောင်ႏ ဝွေꩻသီးအတာႏကာလꩻအီဒါႏ ထာꩻသေပညာႏဗဟုသုတ လိတ်စောင်ႏ📚ဖုံႏယို မဉ်ႏဖြေꩻဖေႏနဝ်ꩻရဟဝ်ငါႏသွူ...။
အွꩻဒဝ်သားတဖြာꩻ တနီꩻယို ဝွေꩻအတာႏဒဝ်ငိုꩻ နဝ်ꩻလို့ခန်း လစ်ꩻရေင် ၊ ငတ်ꩻရေင် ...တလာယို လို့လဲဉ်း တသိန်ႏခွယ်ꩻ..နဝ်ꩻမိဉ်ႏတဲ့တွက်ꩻအဆေ့ꩻသွတ်ꩻ သွူ ...။ဒဝ်ငိုꩻတသိန်ႏခွယ်ꩻယို နီလမ်းကိုကိစ္စအတာႏ ၊ နီပိုမာအတာႏ ၊ လိုꩻမုရေꩻ ၊ ပညာႏရေꩻ ၊ အံႏအွꩻတာႏ နီမိဉ်ႏသွုံꩻအီနဝ်ꩻ အကျိုꩻရအဝ်ႏငါႏသွူ🌻🌻
💵ရွဉ်တသိန်ႏခွယ်ꩻယို နီကလားကာအွꩻဒဝ်နဝ်ꩻ နီရပ်ကို ၊ အွိုင်ႏကို ၊ လိတ်သွဉ်ကျောင်ꩻ (စာသင်ကျောင်း) အတွက်ꩻတာႏ နီမိဉ်ႏလူႏညီမွိုင် ခုံႏတရိုꩻတဝ်း ၊ လိတ်စောင်းတရိုꩻတဝ်း ၊ဝင်ꩻမာꩻတသာကျောင်ꩻတွော့ꩻ လူႏညီသော့ꩻညီ ဝင်ꩻနဝ်ꩻ အကျိုꩻအာမွေးသွူ...။ဒုံယဟန်ႏ ၊ ရပ်ယဟန်ႏ နဝ်ꩻဗွေႏဗွန်တန်ကဗွောင်ꩻဒျာႏ ပရဟိတကျောင်ꩻတရိုꩻတဝ်း ၊ မွိုးဖါတအဝ်ႏတဝ်း လိုꩻပေႏအတာႏ ကထိန်ꩻထွားဒျာႏ ဗွေႏဗွန်သီး ကျောင်ꩻတရိုꩻတဝ်း ၊ နီမိဉ်ႏလူႏနဝ်ꩻ အကျိုꩻယိန်း အာအာသွူ...။🌺🌺🌺
အွꩻဒဝ်မꩻပျောႏတမွေးတဝ်း......အွꩻတဝ်းဒဝ်တဲ့အဝ်ႏ ပျောႏဒျာႏနေနေ.....တွိုႏယိုနဝ်ꩻ ပျောႏဒျာႏတွမ်ႏ ဒဝ်ကနော နီအသောင်ꩻအရင်ꩻအဝ်ႏနေးမုဲင်ꩻနဝ်ꩻ တသေယူႏတဝ်း...အွꩻတဝ်းစက်စက်နေးနဝ်ꩻတဲ့ ရိုꩻတဝ်းသွူ..အွꩻဒါႏတဲ့...ချင်းဒါႏ လမ်းကိုယိုခွေပိုမာအဝ်ႏ ဒွိုန်းကနဝ်ꩻအဝ်ႏလိုႏယူႏလꩻသွော့...လိုꩻယဟန်ႏနဝ်ꩻ အဝ်ႏကရိုး “ဝင်ꩻနဝ်ꩻထေလဲဉ်းက နီနဝ်ꩻအွꩻဖေႏဝင်ꩻသွူ”တဲ့ ဝင်ꩻကထေနဝ်ꩻ ဝင်ꩻစီꩻပွာꩻရေꩻကဝင်ꩻထေဒျာႏရင်ꩻသွူ...။နာꩻအွꩻဒဝ်နဝ်ꩻပျောႏဗာႏနာꩻတဖြာꩻလွုမ်ꩻ...နာꩻလမ်းကိုနာꩻ ပိုမာသꩻဆင်ꩻရယ်ဗာႏထာꩻယိုတဲ့ နာꩻအဝ်ႏလိုႏယူႏ ချာဗဲင်း..။မန်းငဝ်းအဝ်ႏနေးယို(အရက်သည် မအိုဆေးတဲ့) ဒဝ်ကရိုꩻနဝ်ꩻ ထွာတသီႏသက်ဒွေါင်ႏသွူ...။သက်မိဉ်ႏမိဉ်ဆွာꩻထာꩻ လဲ့ “သုရာမေရယ မဇ္ဇပ္ပမာဒဋ္ဌာနာ ဝေရမဏိသိက္ခာပဒံ သမာဒိယာမိ” နဝ်ꩻအတွိုင်ꩻ သျောင်းညာꩻညာꩻဒျာႏသွော့ဝင်ꩻနော်း......။
အမာႏမိဉ်ႏပါတဲ့ခွင်ꩻလွစ်သွော့
ကေꩻဇူꩻတန်ငါႏသွူဩ🙏🙏🙏
#ခွန်ခမ်းခွꩻ(ဒုံကောင်ထို)
တောႏလင်ꩻလောင်း( ၁ )နီꩻ (၁၄-၉-၂၀၁၉)
No comments:
Post a Comment