လိုꩻတဖြာꩻယိုမဉ်ႏအွဉ်ႏရေꩻဒျာႏအခိန်ႏနဝ်ꩻ
လွိုတဲင်ဗေင်ႏထာꩻအခိန်ႏ ၊အဝ်ႏကုဲင်အခိန်ႏလင်ဖုံႏနဝ်ꩻ
နီနမ်းတွမ်ႏနီနမ်းယို အခိန်ႏတွိုင်ꩻအဝ်ႏထေဗာႏ အရီဗာႏပုစ္ဆာႏနဝ်ꩻသွူ။
နီကအဝ်ႏအုံအခိန်ႏယိုခါတွင်ꩻနဝ်ꩻ
- လꩻဉစ္စာႏနဲ့
- လꩻပညာႏနဲ့
- လꩻကုသိုလ်ႏနဲ့ ရီချာဗာႏနေးနဝ်ꩻသွူ။
ကအဝ်ႏရီပုစ္ဆာႏတွင်ꩻနဝ်ꩻ မဉ်ႏလꩻတဝ်းဒွိုန်း တမျိုꩻမျိုꩻ ၊ တစွိုးစွိုးနဝ်ꩻထွာဒျာႏဖျုန်ꩻကုဲင်ချာနီအခိန်ႏသွူ။
ဖျုန်ꩻကုဲင်အခိန်ႏကရိုꩻနဝ်ꩻ တွမ်ႏဖျုန်ꩻကုဲင်နီသက်ယို ဗွိုန်ဗွိုန်ဝင်ꩻသွူ။ စက္ကန့် မိနစ် နားရီႏ မွူးနီꩻ လာ နေင်ႏ စတဲင်အခိန်ႏဒွေါင်ႏဖုံႏကအဝ်ႏပေါင်ꩻစုဒါႏဝင်ꩻဖုံႏယိုနဝ်ꩻ ထွာဒျာႏ လိုꩻတဖြာꩻအသက်သွူ။
အခိန်ႏယိုထွာနီအသက် ၊ အသက်ယိုထွာနီအခိန်ႏ
ဥပမာႏ - နီလင်ꩻတွောင်ခန်းထီ အွိုးထီခြောင်မွိုင်
ထီယိုနီဗွိုန်ႏအီခန်းတွမ်ႏထီကောက်တဲ့ နီလꩻဗော့ꩻထီ တကောက်လွုမ်ꩻ ၊ နီဗွိုန်ႏအီခန်းတွမ်ႏ ဘုံတဲ့နီလꩻဗော့ꩻတဘုံလွုမ်ꩻ ၊ ထီခြောင်ယိုနဝ်ꩻဝွေꩻတွမ်ႏဝွေꩻအဝ်ႏလင်ꩻဒွမ်
တသေႏသေႏ တအုံပွေါး တဝ်းနီနာꩻ နီမဉ်ႏထူႏခါꩻ ၊ ဒွူႏခါꩻတွမ်ႏဘုံတန်တန်တဲ့နီလꩻအာထီ...သွူ
အခိန်ႏယိုတဲ့နေးနဝ်ꩻနေနေ နီမဉ်ႏထူႏသွုံꩻဒါႏဒါႏဒျာႏနဝ်ꩻ
နီနမ်းတာႏအကျိုꩻအဝ်ႏအာငါႏမရေႏမရာႏသွူ
နောဝ်ꩻမꩻအခိန်ႏယိုနဝ်ꩻအရေꩻတန်ငါႏအကျောင်ꩻ.....
#ခွန်ခမ်းခွꩻ(ဒုံကောင်ထို)
၈-၂-၂၀၂၀
No comments:
Post a Comment